A sexta edición do ciclo Mércores no Solpor comeza esta semana no Museo Verbum de Vigo coa presentación de Arrolos de Salitre, o segundo traballo do dúo composto por Xabier Díaz e Guillerme Fernández, tamén membros de Berrogüetto. Guitarras, acordeóns, voces e unha enorme sensibilidade na procura de novos camiños para a música tradicional contemporánea. A cita será hoxe mércores ás 20.30 horas e a entrada, gratuíta.
O 3 de agosto a quenda será para outro dúo. Clara Gayo e Iria Pinheiro levan á azotea da Casa das Palabras o seu novo cabaré, Área de descanso. Completan a programación o colectivo Indio Palo, coa montaxe Tras-Cendere (10 de agosto), e Xardín Desordenado, o grupo liderado por Santiago Ferragud (17 de agosto).
